*ਤੜਕਸਾਰ ਹੀ ਆਦਮਪੁਰ ਦੇ ਪੈਟਰੋਲ ਪੰਪ ਤੇ ਚੱਲੀਆਂ ਗੋਲੀਆਂ ਲੁਟੇਰੇ ਗੱਡੀ ਖੋਹ ਕੇ ਹੋਏ ਫਰਾਰ*

*ਤੜਕਸਾਰ ਹੀ ਆਦਮਪੁਰ ਦੇ ਪੈਟਰੋਲ ਪੰਪ ਤੇ ਚੱਲੀਆਂ ਗੋਲੀਆਂ ਲੁਟੇਰੇ ਗੱਡੀ ਖੋਹ ਕੇ ਹੋਏ ਫਰਾਰ* 

ਜਲੰਧਰ, 09 ਜਨਵਰੀ,   (ਵਿਜੈ ਕੁਮਾਰ ਰਮਨ):- ਤਾਜ਼ਾ ਮਾਮਲਾ ਆਦਮਪੁਰ ਤੋਂ ਸਾਹਮਣੇ ਆਇਆ ਹੈ। ਜਿੱਥੇ ਆਦਮਪੁਰ ਤੋਂ ਜਲੰਧਰ ਰੋਡ ਤੇ ਸਥਿਤ ਪਿੰਡ ਉਦੇਸੀਆਂ 'ਦੇ ਪੈਟਰੋਲ ਪੰਪ 'ਤੇ ਕੁਝ ਅਣਪਛਾਤੇ ਨੌਜਵਾਨਾਂ ਨੇ ਗੋਲੀਆਂ ਚਲਾ ਦਿੱਤੀਆਂ ਅਤੇ ਇਕ ਵਿਅਕਤੀਂ ਤੋਂ ਕਾਰ ਖੋਹ ਲਈ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ ਲੁਟੇਰੇ ਮੌਕੇ ਤੋਂ ਫਰਾਰ ਹੋ ਗਏ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਪੀੜਤ ਨੌਜਵਾਨ ਸਬਜ਼ੀ ਮੰਡੀ ਵਿੱਚ ਏਜੰਟ ਵਜੋਂ ਕੰਮ ਕਰਦਾ ਹੈ। ਪੀੜਤ ਦੀ ਪਛਾਣ ਵਿਵੇਕ ਚੱਡਾ ਵਜੋਂ ਹੋਈ ਹੈ।

ਪੀੜਤ ਨੇ ਦੱਸਿਆ ਕਿ ਉਹ ਆਪਣੀ ਕਾਰ 'ਚ ਤੇਲ ਭਰਨ ਲਈ ਸਵੇਰੇ ਹੀ ਪੈਟਰੋਲ ਪੰਪ 'ਤੇ ਆਇਆ ਸੀ। ਇਸ ਦੌਰਾਨ ਕੁਝ ਅਣਪਛਾਤੇ ਨੌਜਵਾਨਾਂ ਨੇ ਗੋਲੀਆਂ ਚਲਾ ਕੇ ਉਸ ਨੂੰ ਜ਼ਖਮੀ ਕਰ ਦਿੱਤਾ ਅਤੇ ਉਸ ਦੀ ਕਾਰ ਲੁੱਟ ਕੇ ਲੈ ਗਏ। ਘਟਨਾ ਉੱਥੇ ਲੱਗੇ ਸੀਸੀਟੀਵੀ ਵਿੱਚ ਕੈਦ ਹੋ ਗਈ। ਘਟਨਾ ਦੀ ਸੂਚਨਾ ਪੁਲਿਸ ਨੂੰ ਦੇ ਦਿੱਤੀ ਗਈ ਹੈ। ਡੀਐਸਪੀ ਤੇ ਪੁਲਿਸ ਪਾਰਟੀ ਨੇ ਮੌਕੇ ’ਤੇ ਪਹੁੰਚ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਸੀਸੀਟੀਵੀ ਫੁਟੇਜ ਹਾਸਲ ਕਰ ਲਈ ਗਈ ਹੈ ਅਤੇ ਜਲਦੀ ਹੀ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਜਾਵੇਗਾ।